poradnik2 Wilijne wspomnienia starzyka.

Jakech był małym bajtlem, co to wiela razy za balem lotoł,
dwom dziołchom w jedyn warkocz długie ich włosy splotoł,
robił rozmaite gupoty, czynsto takie, że się wszystkie starki boły,
dycki mie djoboł kusiył by se jeździć na krowach co w oborze stoły.

Była już późno jesień, mróz, wichura, zima śniegiem za kark wieje,
wszyscy już wieczerzo zjedli, dobytek obrzondzony a jo myśla co sie z krasulą dzieje.
Czy se leży wygodnie na słomie, czy stoi, źre jeszcze siano a łogonem goni muchy,
czy też se miendzy sobom godajom, bo takie mnie od starzyków doszły słuchy.

Musza obejrzeć, czy to rychtyk prowda, czy tak ino starzyki godajom
a nas małych bajtli durch cyganiom i za gupich gupków majom.
Długoch nie czekoł. Kej już starzyki zaczli fest chrapać
wylozech z izby boso by laciami w podłoga nie klapać.

Wlozech cicho do obory, lampy nie rozrzygom, zawiyrom dźwiyrze bo zima leciała,
ida, ale nie słysza by zwierzynta godały, bez to żech wloz na świnia co se leżała
pod kotykiem. Ta zaczła kwiczeć, przewróciła mnie do gnoja, loce po oborze,
krowy zaczły muczeć, kokot pieje, świnie piszczom aż je słychać na dworze.

Nogle światło sie rozświyciło, w drzwiach stoi starzyk z krykom na złodzieja.
„Synku” godo, „jo ci ta koszula krykom wypiera jak ci pora razy niom wleja”.
„Starzyku, jo chcioł ino wiedzieć czy krasula i ten dobytek cołki
richtik godajom miendzy sobom, czy to ino starych bery bojki”.

Starzik pociep kryka, chyciył mie zmazanego, umył, położył spać a od rana,
jakech sie ino obudziył, doł mi śniodanie, pogłoskoł i wzion mie na kolana.
Terozki dostana lyjty za cołko moja gupota. „Starziku, jo chca wszystko naprawić”
zaczonech godać, ale starzyk durch sie śmioł, pokrencił głową i tak zaczon prawić.

” Wszystko to je richtik prowda co starzy ludzie od lot o zwierzyntach godajom,
musisz ino wiencyj wiedzieć kiedy, co i jak, w jakim jenzyku one rozprawiajom.
Kozy beczom, psy szczekajom, a ryby po swojymu godajom, ty tego nie umisz
ale jak sie bydziesz dobrze uczył, to na starość ich wszystkich zrozumiysz”.

Wodzisław Śl. 15.11.2014 r. Szkrobok.

Comments are closed.

Post Navigation